(زجل) لمحمد مكاوي
مال عجينتنا فطيرة شحال هذا وما بغات تخمار
واحد ينقص في الماء وواحد يغش ف الدقيق وواحد سارق لنوار
واحد زول الفرحة من قلوبنا وعوضها بالأكدار
واحد عندو الخبزة كاملة مكمولة من أيام جدودو
ومية كتقلب على كسيرة د لحرفي للصغار
واحد عندو مئات ومئة ألف هكتار
في البراري والسماوات والبحار
وألف عندهم غار
عاودو لعجينة
وزيرنا ما فيه سر ما فيه ملح
على البرلمان والكرسي كيشطح
بجهل ولادي وولادك كيفرح
بشقايا وشقاك وحقي وحقك مفطح
ما عندو دين ما عندو مذهب ما عندو ملة
حنا مكلخين وهو حاسب راسو فاهم ومطرح
عاودو لعجينة
مرضانا ضايعين ومنسيين
كينتظروا في الخبزة تطيب
ساعة ما كاينه لا صحة لا تعليم ولا تطبيب
غير البطالة
وثوب الدلالة
وقراية الجهالة
والسرقة والنهب والتخريب
واحد يزور
وواحد يحور
وواحد يكور
وواحد يخور (من الخوار)
عاودو لعجينة
الدل نزلتوه علينا
والجهل عليه صبحنا ومسينا
والأمم ضحكتوها فينا
بردعتونا كيبغيتوا
يا قلال الوفاء
كليوتنا ماكلة الباز
وطيبتوا قفانا بالمنغاز
عاودو لعجينة
هذا زمان طل
لي سمان لازم يهزل
ولي ركب علينا شحال هذا خاصوا ينزل
ولي كذب علينا
وضيع عيالنا
وشرد شبابنا
وحسبنا هبال لازم يرحل
يرحل يرحل يرحل
إن أي تشابه مع الواقع هو من قبيل الصدفة