الحاج عمر الزواق .
لا تسولني ع الكلام الملغوم
واللغى اللي ما مفهوم
لا تسولني ع الهموم
وعشرة بنادم هاد الزمان
ونفاق هاد القومان
لا تسولني ع اللي ناوي لغضر
وحامل ف يديه مشموم ..
لا تسولني
ف قلبي من لهبال شلال
و ف راسي اللي ما يتقال
واللي بغا يعوم .. يعوم
واللي خاف يسد بالزكروم …
لا تسولني
ياك قلت ليك أنا فضاح
ما نستر ع الظالم
ما نتملق للحاكم ..
لا تسولني
كلامي واضح صداح
فاهمينو الناس لملاح
راويه الحق بأقداح
تداوي الخاطر ولجراح ..
لا تسولني
ما نعرف نبني بالحروف
ما نمدح ما نزين ما نحرف
ويلا حرافت ليا الجرة
ناكل غير الحرفي
ونشبع .. كاهماني النفخة
ويلا تلفات ليا الحرفة
نرتاح .. نبعد من التخراف
ما نتاجر ف وهام
ما نبيع خرافة ..
لاتسولني
ع العشق والغرام
أحياني ع السكرى بلا مدام
كيلت من لغرام سنين واعوام
لغرام
أولو جوع وبنة
واخرو موالفة ومحنة
وشكون اللي من لغرام تهنى
شكون اللي ما عاش لحلام
وقلبو داق حر لسقام
شكون ؟؟
لا تسولني
ع الكلام المنفوخ الكبير
ع الإنصاف والعدل والتغيير
ع الحقوق وحسن التدبير
لا تسولني .. سمعنا غير التهلال والتكبير
ها المصباح .. وفاين المفتاح
المسكين زادوه جراح
تابه مذبوح ف المراح
وشكون سمعك ألبراح ؟
لا تسولني
لاتزيد ف الهضرا ولكلام
إيلا سمعوك يفرضو عليه ضريبة
ولكلام إيلا كثر راه مصيبة
خاصو قانون ونظام
وضريبة ع الفام ..
لا تسولني
الله يهديك راني عامر
وقلبي فيه لمسامر
كيف قالت المغنية ..
واخا كلامها ملغوم
عارفة آش كتدير
غير بطارة وبندير
يجيب الله كل خير ..
ياك بديتي تفهم
إذن .. لا تسولني
باركة من لهبيش
خليني نعيش درويش_________
من ديوان ’’ كلام منسوم من البارح واليوم ’’