بقلم : الحاج عمر الزواق
اتخلوى .. واسكن لخلا
وبعد من لبلا
اللهم قريص نحلة
تكلع شوكتها وتبرا
اللهم السرحه مع بكرا
تسقيك حليب بلا هضرا
اللهم الضو بنور الكمرا
وتحس بقيمة القدرة
اللهم لخلا
ولا جميل بنادم المسموم
المتسلي بالمصايب والهموم
المتشفي ف حال المظلوم …
اتخلوى .. ودير من لخلا خلوى
بعد من شر الخلايق
وخليك من الوسواس خالي ..
واللي بغا عيشة لمدينة
يصبر ال لغبينة
وخا كلشي قريب حداه
بنادم اصبح مكينة
الصداع ف الرجلين
سير جيب
ارجع جيب
اخوي داك الجيب
بدل هاد المقضية
ناعورة من الصباح ال عشية ..
الصداع ف الوذنين
صوت راديو الجيران
تصفار الكوكوت
تقرقيب الطاوات
صوت العساس
يهرس الراس
أصلو من العروبية
كلامو بريح
ويلا ساط فيه الريح
يصبح نطيح .. يقتل الراحة
والراحة كالو لهيه
آش درنا باش نستاهلوها
الراحة بثمنها
يستحقها قلب حنين
مولاه سكن فيه المسكين
وقسم معاه العولة
قلب تسيل دموعو ويدان
إيلا سمع كلام الرحمان
وفاز على حزب الشيطان ..
اتخلوى .. وذوق لحلاوة
ودير من لخلا ..خلوة .
سلا ، 23 أكتوبر 2015