بقلم : الحاج عمر الزواق .
إيلا اعمر سوق لكلام
وجاو لحروف صربة
شكون يكون علام
شكون يشعل الجدبة ؟
واش الليف المهموز
ولا السين المرموز ؟
واش البا
الصايكة الكيران
بلا عنوان
ولا البا الثانية
اللي مخها طار
ولسانها عار ؟
واش الحا
الحاصدة الجنان
وخالعة الفيران
ولا واو .. الامان
ف باب البرلمان ؟
وياكما النون
المشمشة على برا
ذاقت الظل
ونسات الهضرا ؟
وياكما الها
الواقفة ف اللها
وهمتها ما تخفى ؟
وقيلا لحروف
تحرق ليهم الجوف
ودارو كلمة كبيرة
صنعو ليها جبيرة
وكالو الله يشافي
من هاد لعوافي ..
وشحال من سؤال
تحط وتكال
والحال هو الحال
إيمتا تتفك لوحال
والضيقة اللي ف البال ؟؟