قلم : الحاج عمر الزواق
قبل ما تربط عنقك
كان كلامك صحيح
كان لسانك
بالعسل يسيح
وغير ركبتي
كشفاتك ليام
وهزك الريح ..
شفنا التبوريدة
والشطيح بالتسبيح
مشاو العفاريت والتماسيح
وطارو لخرايف مع الريح ..
باركة من الرديح ولبريح
ياك أنت إنسان …صريح
إيوا بشحال بعتي لمليح ؟
وباش نصدقوك
عطينا لسانك
نقطعو بيه حبل لكذوب ..
وباش نتيقو بيك
سلفنا وجهك
نمحيو بيه الذنوب ..
وباش تعرفوك
ورينا املاكك
ورصيدك التامر المحسوب ..
وباش نفهموك
فتح لينا قلبك
ياك ما فيه مكروب ..
وباش .. وباش .. وباش
ياك احنا عندكم غير أوباش
واخا ما درنا علاش ..؟
ياكما كتعاقبونا
على غفلتنا وصواتنا
وبها كتصوتونا ؟
ياكما ظنيتونا
غادي ننساو اللي قهرنا
ونكرنا وغدرنا ؟
ياكما حسبتونا
كنفكرو بجيوبنا
وغدا تتمسكنو وترشيونا ؟
ياكما .. وياكما .. وياكما
غير اجمع قلوعك
راه هزك …الما .
تعليقات الزوار