_بقلم : الحاج عمر الزواق
…………..
اشتف .. وهز رجليك بالخف
اشتف .. ما بقى ما يتنتف
اشتف .. الصندوق المعلوم تجفف
اشتف .. الريق شحف ونشف .
_______
من كثرة الظلم .. الثقة هربانة والحق ازعف
الحالة عيشة ف بطانة والجنان اخرف
الصايكين بنا طفاو الضو والنور اكشف
الحسانة ف روس ليتاما ومشيط العرف .
_______
احزابنا ثلجها ذاب .. عقلها اخرف
عقودها رشات .. معكزة عل الشرف
اشتف وزيد اشتف .. كلشي اتلف
الزيادة ف لفهامة وقلة العرف .
______
النقابات شعارات وغوات وحلق ما ينشف
والبيع والشرا والهضرا وكثرة العلف
اللي طاحو اكتافو غير حال فمو ويحلف
متحايل عل الوقت همو ينتف ويهرف .
______
وهادوك خدمو المال ودخلو للصف
واللي تربى عل الخيانة يطعن من الخلف
واصحاب الزرواطة دفعو بنادم للطرف
وتهموه بالتفكير لعوج واستعمال العنف .
_____
واحنا محنتنا محنا .. جدورها ما تخلف
وايامنا متشابهة مضروبة تحت الدف
اللي عارف الكارطة فهم معنى الدف
وأنا ، بحالكم مهموم صدقوني بلا ما نحلف .
