من ديوان ’’ كلام منسوم من البارح واليوم ’’
الحاج عمر الزواق .
اللي موالف شهوة التعناق
ما همو جرح السلاسل
ولا ريحة الطعام الباسل
مساوي بين لفراق ولحماق ..
……….
اللي موالف تربية لفشوش
يتخلع من الظل
ما يعرف حدود الذل
كذاك بنادم المغشوش ..
………….
اللي موالف يطير ف السما
صعيب عليه يتواضع
وف ارض الله يركع
غير إيلا ذاق الحكمة ..
………….
اللي موالف يتعامل بالمعكوس
إيلا خالفتيه ترضيه
ويلا رشدتيه تعميه
عقل مزفت كلام مسوس ..
………….
اللي موالف يعيش بالهريف
يطمع ف راس لقرع
ينتف منو شعرة ما تنفع
ويدير من النصراني شريف ..
…………
واللي عطاه مولاه قلب كبير
يحس باللذة إيلا سعد الغير
أنت تشتت وهو يجمع
أنت تشرك وهو يرقع
انت تاكل وهو يشبع .