من ديوان ’’ كلام منسوم من البارح واليوم ’’
الحاج عمر الزواق
من صاب لحباب ولصحاب
يسكنهم _ بحالي _ حب الصحرا
تمسهم جنون الرملة
وسحر الارض معانقة السما
ويذوقو حلاوة لهنا
والصمت إيلا غنى
ف الصحرا ..
من صاب اللي يسقيني
بالكلام الراقي
حتى يطيب فياقي
ويكون كراب شاد لحساب
ف كل ركعة يفتح كتاب ..
من صاب اللي يداويني
بنور الشمس الضاحكة
وضو الكمرا العاشقة
وبشفار عينيه يغطيني ..
من صاب يرجع يحبو
ويطل ع البير الكبير
يفيض ماه ويحلبو
ويحرث على جنابو
حنة وكمح وشعير ..
من صاب يعمر شكاره وقراب
ويفرق الخير ع الأصحاب
قناطر من الصبر والقناعة
تكون هي العملة والبضاعة ..
من صاب ترجع ديك ليام
اللي كانت اللذة ف لكلام
والمحبة هي ليدام
كان اللي بغاك , بلا طمع
يحامي عليك ف ظهرك
واللي كرهك يكول عليك قرع
واخا تكون بشعرك ..
من صاب ترجع الصابه
ونطيرو بالاحباب
ندخلو من داك لباب
الطال ع الكعبه
وكلها يلغي ببكاه
كلها مركب امو واباه
راويهم بعرق المحبة ..
من صاب نعيشو خيرات زمان
بالعقل ديال دابا
يرجع الامن والامان
ويرجعو السبوعا للغابة
تزند العافية ف الفران
ويرمضو عيون الكذابه ..
من صاب يغيبو الحطابة
ينساو ديك الغابة
واحنا نلعبو فيها حابه
نديرو الخيل من الشطابه
ونسبقو الريح والسحابه ..
من صاب كبة من النحل
يداوي به العيان
وشبكة من النمل
يبني بها طرقان
وعلى عينين الخوت
زيد حتى العنكبوث
خليه يطرز المنجج
تموت الرتيله بالغيرة
وتكسى القبيلة
من بركة غار حيرا ..
من صاب القلوب تذوب
ويسيل عسلها
والمحبة تصبح مكتوب
الشيطان ينعلها
وندفنو مع كل الحروب
سوارتها واقفلها ..
من صاب يفهمونا
اللي حبيناهم وحبونا
يديرو من النظرة احلام
ومن المحبة لحن وانغام
ويصنعو من الصمت كلام
وراية ..شعار للسلام .