بغيت نكون —

زجل : الحاج عمر الزواق

بغيت نكون كلمة

عندها الكلمة

لقيتني ريشة

ساط فيها الريح ..

بغيت نكون وشمة

على خدود الحشمة

لقيتني رازم

نوض ونطيح ..

بغيت نكون فرحة

قاتلة الهم والكرحة

لقيتني خاوي

على كرشي الما

غارق ف لحما

داير من الهم نعمة

مخلط لعجينة

وملهوف …

بغيت نكون قانون

موزع لفنون

وتكون مني الكاينة

موجود ف هاد الكون …

بغيت نكون نسمة

على جناح الريح

فاينما كان الظلم تطيح

ثلج

راوي لعليل والبكمة ..

بغيت نكون بسمة

على وجه ليتيم

تكول : لحبيبة مي

وتذوق حلاوة لمحنه ..

بغيت نكون همة

واخا قانع بجغمة ولقمة

حقي من لحلال راه تمة

وراسي مرفوع للسما ..

بغيت نكون نغمة

تشطح عليها الحرية

يعانقها الدري والدرية

ويدفنو ايام الغمة ..

بغيت نكون بحال اخوتي

بلا زيادة بلا نقصان

حيث إيلا كثرو لمغارف

حقي تكال ومال الميزان ..

بغيت نكون واقف

ماشي موقف بالوقاقف

ومعكر بدوك لمشاقف

اللي زوروهم لمعارف ..

بغيت نكون ، أسيادي

وتكون مني الكاينة

خيال مسكون

ما راضع من الحاينة ..

بغيت نكون ، أحبابي

مع اهلي راوي بالملحون

عارف قدري ف هاد الكون

ماشي مغرور .. ماشي مجنون ..

بغيت نكون ، أخواتي

نقطة ف كتاب

تغير لمعاني

تضبط لحساب ..

بغيت نكون ، أكراني

نافع ، همة وشان

ثوب ابيض كتان

ساتر ومدفي الانسان ..

بغيت نكون ، أجيراني

ساكن ، ما سامع ’’ شكون ’’

بلا خصام ملعون

واللي راد الله يكون ..

وبغيت نكون .. نكون

بيناتكم منتاصر

وملي نسكن لمقابر

بدعواتكم مدكور ، حاضر ..

… بغيت نكون

ف قلوبكم ديما .. ساكن .