من ديوان ’’ كلام منسوم من البارح واليوم ’’
الحاج عمر الزواق .
ساوي .. تعيش هاني
ساوي .. كلشي هاني
ذوق حلاوة المعاني
وتبنن السوق الخاوي
ساوي حلقك
يغني ليك
يشطح لسانك
ساوي قلبك
يسخنك .. يذوب ثلجك
الساجن المحبه فيك
سرج غرامك
يسري بيك
يوصل تنهادك
للكلب اللي يبغيك
ساوي وداوي
واكوي الركن الخاوي
يفارقك لهلاك
تتشافى من بلاك
ساوي ميزانك
واعبر لكلام
صروف لكلام حروفك
حروف لكلام صروفك
وزن وشيط
وفصل وخيط
وخفف الذنوب عليك
ساوي وانسى التناوي
صاحب النيه
ديرها ابنيه
من اولادك
وتشوف كيفاش لكلام
شتا يصب عليك
جايب معاه لهديه
يبارك ليك …
ويلا بغيتي تجرب
وتفهم لكلام المجراب
ساوي وكول اقوالهم
مدح وبرح
وتشوف كيفاش تصبح
على عيون الناس
يديرو ليك حراس
يوصيو عليك
بنادم يبندق ليك
يحسوك بالعنايه
وتدير لا باس
ما حدهم محتاجين ليك
يكسيوك ويسبطوك
يوريوك الجنه ف عين الديك
وحيت يجي وقت حصادك
يعصروك ويمصوك
ويرميو ف الخلا عظامك
تعيش قبر منسي
عافوه الناس
يشبه النكاسه
مغطي بحلاسه
مدركين لبلا والباس
وتحاول ترجع تساوي
تخلط عبارك
وتحاول تداوي
ظلام نهارك
الندامه لابساك
واللي كانو حاسدينك
نساوك
خلاوك ف بلاك