سلا : الحاج عمر الزواق
من ديوان ’’ كلام منسوم من البارح واليوم ’
كال ليا صاحبي …
اكلس حدايا .. مالك مكدر
دوق وشوف .. آش خاسر
هدا شقيف من النوع المعتبر
الناس كلها ضاحكه
وانت وجهك مغير
الناس مبشورة وانت فمك عواج
دوق .. رد لمجاج
طير ف السما..ركب لمواج
حرت ف الما.. بلا تعواج
هاد السبسي من العيسي
بيو ..أصل كتامي , وحتى الطابا
كلشي ربيع ومن داك الشي الرفيع
هدي فصتي معا السبسي
قصة غريبة
بدات ف الحومه
ف قاع الدريبة
وف فران المعلم دحان
كانت البليه بالدخان
مرت ليام وبديت نقاسي
من الداخل مسيوس
صبحت داتي هي حبسي
كالتني السوسة
وقيل رفضاتني : لقاتني مسوس
وانا اليوم كنقاسي
صبحت شوها .. سماوني السبسي
طويل وخاوي ..ضلوعي محسوبة
عريان واخا مكسي
كناكل القوت وتنسنى الموت
ما نفعوني فلوسي .