بقلم: مكلخة
مال بلادنا ولات بؤرة الفساد المفضوح، كون غير دارونا في غينيس لتحطيم الأرقام، نحصلوا على رتبة مشرفة فالدعارة وقلة الحياء، فالأمية حنا من الأوائل ما شاء الله، الأساتذة مشتتين في الشوارع يا كلوا يماهم لعصا علاش قراوا، هم الوحيدين إلي دايرين ليهم العمل بالعقدة والتوظيفات خدامة عادي، وناس متتعرفش حتى في أي وقت دوزوا المباراة، ياك محتاجين للمعلمين ؟؟؟؟ آش هاد التناقض ؟؟ أستاذ الفرنسية ولى يقري العربية كيف ما قرها المهم يعمر الثقبة إلي كاينة، القسم فيه 50 تلميذ فالقسم هادشي حدا العاصمة ماشي بعيد، والمدارس تاتسد، باش باباك تمشي تقري ولدك بالفلوس موت يماك فيهم وزيد الشحمة ف… الفاهم يفهم، الله يدير لينا تاويل ديال الخير شفتو قلة القراية والوعي فين تيوصلو فضايح للجهل، للركود فآخر سلم التقدم، تالفين غير مع نصاصنا وشهواتنا، واحد لعبت بيه برهوشة ودخلاتو الحبس والثاني معري علينا… قالك شنو ؟؟؟ تعرض لعملية ابتزاز، والفيديو قديم، قديم ولا جديد زعم ولا فقي ديال الجامع بالحق حتى لفقيا ولاو بخبيزتهم… أكيد احنا ضد الابتزاز كيف ماكان، وأكثر ضد التبريرات الحامضة لي ماليها معنى ولي تاتزيد الطين بلة… شنو ماشنو خاص ندافعو على الصنهاجي حيث وقع تحت عملية ابتزاز… وغمضوا عويناتكم على فخيداتو وهو أولى من المجرد ندافعوا عليه… فين كاينة المقارنة ؟؟؟؟؟. كل فساد وميوعة وقلة الدين، وفلتات تتفضح المغرب العميق الفاسد… والجميل في الأمر خاص قانون يحمي المخنتين فقصاراتهم المجونية، حللو وحرمو على نوتاتكم الموسيقية… هد الزمان كولشي ولا مقلوب، عالم الإسقاطات المرضية.. قال سبحانه وتعالى في سورة الإسراء: “وَإِذَا أَرَدْنَا أَن نُّهْلِكَ قَرْيَةً أَمَرْنَا مُتْرَفِيهَا فَفَسَقُوا فِيهَا فَحَقَّ عَلَيْهَا الْقَوْلُ فَدَمَّرْنَاهَا تَدْمِيرًا”.