كالوها عينيك

من ديوان ’’ كلام منسوم من البارح واليوم ’’
عمر الزواق
.
عينيك ماشي بحالك
ما فيهم كذوب
عينيك شاهدين على حالك
ما بغاو ذنوب
قريت ف عينيك
كلام الضصارة
شميت ف عينيك
ريحة النصارة
وقيمتك ياخسارة
دفناتها القصارة ..
عينيك خبروني بالمجهول
رموشك عطاوني اخبارك
ما بقى عندك ما تكول ..
ضيعتي الصدق والمعقول
والثقة اللي كانت فيك ..
تصرفتي بحال المهبول
الريح اللي جا يديك ..
الريح ما ريحك
ما طفى نارك
الريح عراك
وافضح اسرارك ..
ضحكو عليك اللي طمعوك
زينو ليك ليلك ونهارك ..
مسحو رجليهم وطفاو فنارك
اصبحتي غريبة ف دارك
دارتها ليك خفة رجليك
خرجتي من قلوب احبابك
والبلية كانت اسبابك ..
ظنيتي حليب لبراني يداويك
حسبتي الشهرة ترفع مقامك
فكرتي بكرشك ونسيتي احلامك
نكرتي اللي كان يحبك ويواسيك ..
كنت وردة قبل ما تدبالي
وعاندتي بالخاوي بلا ما تبالي
ملي بعتي بالرخا ملكك الغالي
طحناتك الرحا .. رماتك للبالي
واصبحتي شايطة ف جنان خالي
لعناد أمولاتي ما يكون ببيع الذات
البير إيلا تنجس تحرم شرابو
لعناد أمولاتي ما يمحي اللي فات
القلب إيلا داب يسد بابو
وا كثرو الذياب ورا بابك
مضاو نياب الغمة واحسبتهم احبابك
واحد افرس وعرف آش تمة
وهذاك دار عضة وشمة
والشمة تعيف وتقتل الهمة ..
وا كثرو الذياب …
كالوها عينيك الشاهدين عليك
ما بقى فيك غير الهضرا
خليناك حتى تموت والا تبرا .