بقلم الحاج عمر الزواق .
ياك السي فلان ما ظلمناك
ما جبدنا عليك نحل
ما اغتصبناك ما ضربناك على كفاك
ما درنا ليك فاش توحل ..
تعايرنا كدام الناس ، وتكول لينا محبة
ما خليتي غير اللي نسيتي وتكول مشطبة
إيلا المعيار محبة احنا كنبغيوك
واسمع نكولو ليك
أنت لسانك طويل
أكبر من داك الشي
والشي بالشي معروف
لاتكون ملهوف وتطول الشوف
آش بغيتي في منتوفة الرموش ؟
كلتيها : أنت باغي تلخشا
والزيت والحرشا..
آش عرفتي للزين
وأنت خانوك العينين ؟
الناس راهم فاهمين
علاه بحال اللبن بحال الشريحة
بحال الحشمة بحال الفضيحة
وا أجي تسمع ..لا تبقى كتركع
راه الدين والشرع
كممنا على الضرع
آش من ضرع ؟
الضرع اللي ما ينفع ..
كالو عليك شريتي عود
من سبان الناس
لجامو طويل بلا إحساس
واحكمتي بقوة الفاس
هدا زين .. هدا شين !
ياك عارف كلشي خلق الله
وما فيه عجب
واللي تعجب ما غير حال
العجب كيجلب الذنب
والزين دوامو محال ..
وا السي فلان
كلامك يمكن زين ورزين ..
وجوابي ما لقيت عليه فين
باش ماتدي ذنوبي
واش سمعتي منا شي حاجة
باش تديرنا للناس فراجة
ولا عقلك في ودنيك
الريح اللي جا يديك
ويكما واكل الفول
غير جيب أفم وكول
ها انت شفتي لكلام فين يوصل
اللسان يجرح ويطيح الباطل
والحكمة في الصمت كيف كالو
والصمت معا الحق ما سوى والو
وخا عايرتينا كدام الناس
كلامك على العين والراس
وانت يا … مجدوبي
غادي تبقى ديما محبوبي .