بقلم :عمر الزواق
من ديوان ’’ كلام منسوم من البارح واليوم ’’
بلا نية ما يتكاد حساب
والقراية تمضي الناب
والبيع والشرى إيلا عاب
اعرف الغش كان سباب .
……….
العاقل ما يهين حباب
والكتاب اغلى من لصحاب
وإيلا البني الجديد راب
لازم من الحساب والعقاب .
………
الضرسة المريضة دواها كلاب
والدار الخربة يسكنوها الذياب
وشحال من ذياب صاحبو لكلاب
تديرها المصلحة وقانون الغاب .
…………
لا تعاند اللي والف لعذاب
الحليب ما يفيض إيلا راب
القلب ما يتحكم إيلا ساب
والزرع لازم يتحصد إيلا طاب .
………..
رد بالك من كثرة الاحزاب
والجيعان إيلا ملك التراب
وبنادم إيلا صدق الحجاب
ودار رجاه ف مشعود كذاب .
……….
كالو المرا تتقب الجياب
وتصدر بالسترة للأحباب
بنت الخير ما تسد باب
وتصون زمانها إيلا غاب .
……….
ملي بنيت دار من التراب
ظنوني اذكى من الغراب
ما حسبو الشقا والعذاب
والقلب اللي تحرق وذاب .
…………
كالو ف الشتا صاحب الكراب
تلقاه ف الحر والشدة من الاحباب
وف الصبح لازم القبلة والمحراب
النظافة تداوي لعليل والمجراب
ومن الصواب لازم دقان الباب .