الإسكندرية: رأفت رشوان
غنت فيروز..
( يخرب بيت عيونك يا عالية شو حلوين)
وانا قاعد مشكوح
رجليا مفتوحين
أحرك ايدي شمال– راسي بتدوخ
جنبي المشمش والخوخ
واحرك رجلي يمين..
ألاقيني مملوخ..
وورايا عنب مع منجة وتين
فرحان جدا مبسوط
طز.. ف اللي يزعلني..
لو حتي هو وزير
ايه يعني هاموووووت بالقلب
أو حتي هاحتاج قساطير..
دعا ماااات
ويقولوا
.. رأفت ماااااات
ايه يعني هاتفسخ اربع ترباع
واتباع
ويحطوا علي لحمي شطة وخل وتوم..
ياكلوني
ما انا من اول.. ما اناعلمت الدنيا الشعر..
وانا واكلينني المفاجيع
من أول بيع يا حسني.. يبيع
من بعد الثورة.. بيع يا مرسي.. نضيع
امال لو باع المتقدس نفسه.. راح نبقي ربيع
ايه ده..
صفافير
كله بيصفر
والفيلم قطع
والكل مبلم.. والسيما ضلام
ركب يا عم الفيلم.. وخليه ف الطار
يا عم كان ف العش دا حلم وطااااار
ياااا خلق حرااااام..
مش باين حاجة
نفس نظام السابق..
نفس الراجل اللابس بدلة واللابس هلاهيل
نفس وجع براهيم خطاب
أو مرضي بقلبي الصافي
او جلطة رجب الصاوي
وعالجوه..
يا ولاد الكلب يا شعرا ما انتوش مساكين
حكمتنا الحرامية
احنا كرهنا موت الرجاله ومموسة النسوان
منظومتك فاشلة والعالم خلصان
العالم بيموت..
بيطلع ف الروح
مصر المفتونة بتطلع في الروح
كن صارم كن
طير في حمام الخن
صفا انتباه
والله كلنا بنئن
ومصر حزينة.. حزينة وانت ع الكل تضن
وقلبي محتاج عملية
محتاج شرايين
محتاج يتحط ف حزنه فرح
من كترة ما الوطن الخلصان اتجرح
الووووووووووووه يا معالي اي وزير
خدمت الجيش ييجي ستاشر عام
وخدمت ف ثقافتكم ييجي 43 عام..
وانا لسه حزين مستني الرد.. (من اي وزير)
او حتي قرار لرئيس
أنا قيمة مش سيس
بامووووووت يا ولاد الايه (النجدة)
***
كانت اخر لحظة.. وانا واقف قدام الله بعظمته
وباقول له لو فيه ذنب واحد ما تاخدنيش
ولقيت ان انا ذنبي اني للأصنام ما بصليش
.. رجعني تاني يا رب ارجوك..
عندي حلم ما كملتوش
رجعني أرد الحق للفقرا والغلبانين..
فرجعت..
لقيتني باقول (تحيا مصر)..
عيش حرية عدالة اجتماعية وكانت فيروز بتغني..
.. يخرب بيت عيونك يا مصر شو دامعين