من ديوان ’’ كلام منسوم من البارح واليوم ’’
…………
صاكني ريح لفجر
لشط لبحر
حكيت ليه اسراري
سمعاتني لمواج
كالت أنت ما محتاج
أنت راكبك شلا وسواس
أنت تايه بين الكلب والراس
كل واحد باغي يحكم
يدير التاج فوك الراس
واحد بالسلم والآخر بالدم
الكلب كال .. اسبابي العينين
جاوب الراس ..العينين عندي ساكنين
وصابر حتى على الودنين
وأنت _ ألكلب_ غير كتدق بلا معانى
الفرحه تزيد فيك نغيزه
والخلعه تدير فيك تويزه
وديما راك تعاني
اللي نكول ليك راه فيك
أمولاي الراس
كون حكمتي ف خفة لسانك
كون لا باس
أنت براسك ما عارف الساس
من الراس
دابا يجي وقت النعاس
وتعرف قيمة الدقة
وأنا ما مساليك , نبقى داير فيك راسي
كلامك كثير , كلو وسواس
ويلا عاود كلمتك قطع راسي
كلمة عندي كلمة عندك
ولكلام اصبح قرطاس
عطيني نعطيك
حتى واحد ما عرف الراحه
دقة فيا دقة فيك
حارقين وراق السماحه
وأنا بين هاد الكلب والراس
حاير .. فاين نعطي الراس
قلبت ف كتاب احلامي
على الصدق والمعقول
لقيت الاحساس عساس
الكلب فايض بالدخان
والراس كادي نيران
وفتشت ف تاريخ ايامي
على الوعد والسعد
كال ليا واحد لعقل
شوف واد عوم فيه
يكون جاري كطران
يغطي الشمس بالبرهان
. وينشف أرض الطوفان
وكلت .. ياربي السلامه
ياربي تتاوي الامه
واش الكلب قساح بلا سباب
بعدما كان ارطب من اللباب
وقيلا الكلب مكلوب
فاهم بالمقلوب
اللي شافو دارو محبوب
. ما قنع بالمكتوب
ولقيت الراس مهوس
غاير من الكلب .. شاداه الرعده
وهما جيران .. ساكنين دار وحده
وحتى واحد ما سامح
الكلب مهدد يقطع دمو
والراس صايل ما رافد همو
وعلى عينين الناس
تشوفهم معانقين
عناق النفاق
واحد يبني
والآخر عاطيها للتهراس
واحد يجدب
والآخر يريب بالفاس
واحد مضي لماس
والآخر ضاحك بلا قياس
الضحك كيقتل
والصمت يهبل
واش ينفع الكلب والراس
.إيلا طلعات الأنفاس
وأنا ..أنا خليتهم
ف هواهم مرافسين
وسمحت ف كلبي وراسي
وجيت نشم ريحة لعراسي
ونطهر انفاسي
ف .. مراكش
ف مدينة سيدي بلعباس .
تعليقات الزوار