البصله شكات ..

ياك أنا غير بصلة

ياك أنا غير حصلة

حفيت الموس والنصلة ..

هادي سنين وأنا صابرة ال معيار

جابدة راسي للتقار

مبعدة من العار ..

شحال ما بكيت .. وبكيت

شحال من معدة داويت

كنت طعام المسكين

ف الشلاضة والطاجين ..

شكون تفكرني ف زمان الرصاص

زمان الطشاش والفاخر

ولحريق ف الكانون والمجمر

شكون واساني ف وقت لعراس

حرقوني قوق لعوافي

وقطعوا راسي واطرافي

بلا خباري باعو فيا واشراو

كالو عليا درت كرون

والخضار عز فيا العربون

واللي قطعوني رماوني وامشاو

وعينين بنادم باسبابي بكاو ..

واليوم ملي احكم ليا القدر

بجبر الضرر

كثر اللغى ف سوق الخضر ..

كالو عليا

كبر ليك الشان

طلع ليك الميزان ..

وكالو .. آش هاد لغلا

وشكون يكد عل البصله

شوف كي طلعت للسما

ونسات ايام العشره ..

… سمحوني يا حبابي

أنا بصله مذكورة ف القرآن

ربي ارفع ليا الشان

أنا سلعة الكريم الرحمان

أنا هي .. هي ف كل لمكان

أنا حبيبة لكبار والصغار

مشكلكم مع الغش والاحتكار

مع اللي حاكمين .. الدار .
____________ سلا 4 مارس 2016