الإسكندرية: رأفت رشوان
ابكي وانزف دم
ايه يعني شوية هم
ما انت طول عيشة اللي جايبينك هموم
ايه يعني ولا يهمك
دا انت يا دوب..
شربت حبة سم
—
يا مبعترين لحمي حتت بعد دبحي
طظ فيكم
انا اللي باتحمل صعيب الوجع
يا جدع
يا عم خليك صابر..
دية حياه مش دلع
ابلع وجع
دا انت ياما صدرك بلع..
موت وقهر
وميه سلسبيل
تشفي العليل
وبرضه يا روح امك بنستني بأمل دليل
طب ليه المرار مزودها وخلع
يااا مر يا ابن المر
ارجع هنا
ما فيش مرار من غير المر بيتبلع
يا ليل يا اسود غطيس..
يا نيل يا حر
ليه الشديد اتملع
انا الحرير المنبت قوي بشوك الوجع
انا هو الامير اللي جده كان النبي
انا لو هاكون
هاكون مش غبي
انا ليا قلب وطاهر
اصفي من بريق الماس
باحب الدنيا قوي
واحب كل الناس
صاحب وافدي صحابي
لو كانوا ف ضرب رصاص
جدع وابن حظ وفرفشه بس اتكسرت
وبرغم دا لا راجع ولا بتردد
باحدد وجهتي للموت ومستنيه ..
ولا هاممني الموت.
يجي وقت ما ييجي
انا واد بدم صعيدي
لو افكر اخون.. انا هاقطع قليبي بايدي
واقول للي فكر اني والعياذ بلله باخون..
مد سيفك خلص الرقبه
اللي قال اني خنت هو اللي كان خوان..
خان الوطن وسلبني العزوه والدكان
فان كان لابد م الرجعة اموت
ولا ارجع
للي كان سهتان وهو بيسرقني..
الله اللي فرقني
من ذمة الخوان
يا بلادي شكرا شكرا
يا صحابي عذرا عذرا
يا اهلي موتوا بغيظكم
اهاليكو شبعت لحمي
دلوقتي انا وبشرفي
معييش صحيح فلسان
والله بس باعيش بشويةفلوس ملاطيش
ولا اكلش
من لحمة الخرفان