وْلِيدِي مْشَا وخَلاَّنِي..

الشاعرة المغربية سعيدة الرغيوي

وْلِيدِي مْشاَ وخَلاَّنِـــي

في هَاذْ الدْ نْياَ نْعَانِـي

وَطْرِيقْ الشَّوكْ تَدْمِـــي

ولقَلْبْ فيهْ نارْ تكْدِي

وأنا غْرِيبَة يَانـــاَسْ

غْرِيبَة وِينْ نَمْضِي.. وِينْ نَمْضِي

كالُوا ليَّ كالُو لِيَّ عْلاَشْ عْلاَشْ

تَبْكِي وتَخَمَّــــــامْ

كُلْتْلهُمْ وْلِيدِي مْشَا وَخَلَّانِــي

وَحْدَانِية نقَاسِي العْــدَابْ

فِي دْنْيَا غَــدَّارَة

حَاسْبُوها جَنَّة خَضْرَا

وَعَزْمُوا لِيهَا يَشَدُّوا الرْحَالْ

حَاسْبُوهَا نَجْمَة بَرَّاقَه في السْمَا

وَعْيُونْهُمْ لِيهَا كَانَتْ تَوَّاقَــة

خِيبَة واشْ مَنْ خِيبَـــــة

يَابُويَا عْلَى شْبَابْنَا وِينْ ضَاعْ

ويـــنْ ضـــاعْ

فَمْرَاكَبْ المُوتْ رْمَوْا رَاسْهُمْ

وخَلاَّوْا لَمِّيمَة تْنُوحْ بَدْمُوعْ

تْنُوحْ بَدْمُـــــوعْ

شْحَالْ منْهُمْ غَالَطْ

حْسَابْ المَوَاجْ نْزَاهَة

نْزَاهَــــــــة

يَغَامَرْ بْرُوحُو يَرْمِي لَلْمُوتْ

يَحْلَمْ يَصِيرْ نَجْمَة في السَّمَــا

يَرْكَبْ المُوجْ ويَتْحَــــدَّى

وَيقُولْ مَكْتَابِي لْهِيهْ مَاشِي هْنَـــا

حَسْبُوها جَنَّـــة خضْرَة

وعَزْمُوا لِيهَا يَشَدُّوا الرْحَالْ.

دَاتُّهُم الدَّوامَـــة وخَلَّتْ قَلْبْ لَّمِيمَة بالكِيَّة مَحْروكْ.