بقلم الشاعرة الأستاذة بشرة اسموكن
الى شافت عيني لغزال
ننسى قدر عمري
ونهيم عاشق الجمال
مانخاف ايعيب علي الزمان
نخاف نحضر عقلي
يهجرني ذوق الاحساس
ونصيب قليل من ايام
عمري اللي بقات
ولكماش خيم على ذاتي
واظلال الزين اللي زاد
ماحن ماكان ارحيم يداري
من الشيب اللي ساب وماتاب
وعكر مزاجي بالخراف
الى شافت عيني لغزال
منافذ النفس ينعشها الهوى
والخدود تولي حمرة
والشوف فبحر العين يتلم
والجرح فلعماق يحلم
ايعانق لغزال يتشافى
عافاكم لاتلوموني
واتقولو علي اهرم
ومابغى يحشم
خلوني نتوهم وخى نشرب
من لمقالب مخالب
ونشد وخى فحبال دايبة
غير اركابية ماتبقى ذايبة
وخى غير سويعة سويعة
نكحل عيني بالنهار
ونفرش دفى الشمس
ونشم ريحة بلعمان
وخى من بعيد ونهار العيد
بلاماتلوموني ولا تظلموني
يكفيني ناقوس
الموت طول فوذاني