بقلم : الحاج عمر الزواق
حسيت براسي تبدل
وسولتو
علاش داخل ف ما لا يعنيك
الناس مشغوله
وأنت مشبك يديك
باغي النعمه من السما
تطيح عليك ..
كلت ليه
حل عينيك
الشتا نعمه
الصحة نعمه
العقل جد النعمه
احكم لسانك .. يداويك .
ودعيت معاه
الله يشافيك
من النحس اللي فيك
والحسد الواكل قلبك
والحقد العايش فيك ..
وزدت كلت ليه
الله يهديك
على نفسك الهاويه بيك
ف واد عميق
بلا ما تعيق ..
فيق .. وشحر بريق
فيه ريحة لفهامه
تبان ليك الطريق .
الله يهديك ، أراسي
تابع الريح باغي تمحيه
باغي توصل قبل ما ترحل
باغي الشهد بلا قريص النحل
باغي اللي يهز ليك لمظل ..
واللي نصحك تتواضع ، تكويه
والراس فيه اللي فيه !
كلامي معاك ، أراسي ..
من نهار أمك توحمات بيك
سهمك ترسل ليك
وراه واصل .. واصل ليك
عاملو بحال ضيفك
عطر لمكان .. فرش ليه
ربما يعلمك إيلا وصل .. ويحن فيك
ويخليك تتسامح مع اللي ليك ..
إيوا فكر قبل ما ينكروك رجليك
ويكونو عليك شهود
قبل ما تتغير الوقفه
ويخرجوك .. ممدود !