بقلم فاطمة بلعروبي
نرجاك يا الكَمرة “g”
الهاربة من التسوال
الا ضاقت بيك حروفي
لا تحرزي عليا الخيال
نحرثو فدان
نزرعو نيران
تحرق الجوف الملهوف
بتعاويد الخاطر
المطمور ف هذ الصدر
نذريه عولة
ف كاعة العمر
و نزرد شوفتي فيك صبر.
نرجاك يا الكَمرة
لا تغيبي
و تخلي العساس هلال
يتكمش القلب
دمو ويدان
مواجو تجري ما تعكَب “g”
و الدمع فوق الخد يتكركب
صخر محجر
ما يعبرو ميزان..
نرجاك انا
و الخطوة تابعاني
نرجاك انا
و العطفة متيهاني
نرجاك انا الغريب البراني
كوني بلادي
نملكها عام
كوني جنة
سكننها ندوام
كوني انا
كوني مني
كوني كيف تكوني، و فين تكوني
خلي ظلك قريب مني
لا تحرزي شوفتي
لا تدني قلبي ف كانون ليعتي..
ايه لو كان ندري
نطفي ضو عيني انا من بكري
و نركَد “g” وهامي ف عقلي
و نشعل ف البال شمعة باكبة على الليام
و نحرز على القلب
السرحة ف فدادن الغرام..
ايه لو كان ندري
اش مزمم ل هذ الكسدة
من بكري
نفتلها دوم ف شطابة الليام
نشطب بيها فتاة العطفة
المذرياه الاعوام
ف روى زعواطو هربان بسعدي
المدروس بشية التخمام
ايه ايه
لو كان ندري
ما نطلع ف السما شوفتي
ما نخطط ضياك يا الكَمرة “g”
ما نتهجى حروف العطفة
ف لوحتي
حتى يحركَها جفاك
و تذريها الدموع
رماد قلب
من نيران ليعتي..