رزاق عبدالرزاق
مرة أخرى اعود إلى نص مسرحي كتبته باللغة العامية، من خلال المحاورة التالية، بين احد حفاري القبور و مساعده .
بعد إخراج شاب من باطن الارض دفن وهو حي .
– عبدالسلام : واش نرمي شي بياسة في الجيكس بوكس ولا نخليها في جيبي ؟
– بوشعيب : لا ، الروبو ارجع إلى النسخة الأصلية ، غير تكلم مْعاه طبيعي .
– عبدالسلام : علاش اللا . (يخاطب الشاب) گول آ الرفيق ، كاين شي كليمات على بطل
الصخيرات ؟
– الشاب : فين هو طبيب الصخيرات الخارق للعادة ؟
اللي وجد لكل داء معدي قوة مضادة .
حتى واحد ما بقى يهضر على العُمدة .
اللي غير تا يْرش الْما ، تتعود الأرض مْگادة .
اللي عندو بوزلوم ، اللي عندو المعدة .
اللي عندو الروماطيزم ، اللي عندو گردة .
اللي عندو سْبيق البول ، اللي عندو الغُدة .
اللي عندو لباسر، اللي عندو الكبدة .
فينكم اللي عندهم العواية واللي حسو بلبرودة
كلكم غادين تبراو، من دبا لغدا .
سويعات معدودة ، بلا نقصان ، بلا زيادة .
بلا بْرا، بلا كينات ، بلاپوماضة .
( يغير أسلوب اللغة)
يا أيها الكائن المغناطيسي، لماذا هاجرت البلدة ؟
الكل يناديك ، واصخيرتاه ، النجدة ، النجدة .
الكل ينتظر بزوغ طلعتك الميمونة مند مدة .
وحتى أبا زغيبة ، يذكرك ببالغ المودة .
(يرجع إلى الأسلوب العامي )
ميْهَة سخونة ، ميهة باردة .
تحَيد لعطش ، وترطب الجلدة .
كلام الدجالين ما فيه فايدة .
كيفاش اللي غارق في الغيس بحال الدودة
ما توليش كُمارتو مْشردة ؟
الناس مابقات تضحك ولا تقشب .
هْلكهُم الزمان والوقت لمْقَلب .
ترانات معطوبة وسط الزبابل تدرْدَب .
حمام متنقل ، ومن لغوات تهرب
واللي ماعجبو حال يتْكَركب .
بيبان لكوابن محلولة ، والزاج مضبب .
وگولو باز لهاد المكتب .
سلوكا ديال الضو معرية ، والجو مكهرب.
وگال لك أسيدي مع التيجيفي غادين يلبيو الطلب .
ديال من ؟ الفقراء ولا أصحاب اخطف وانهب ؟
برا لقراية في الميطرو ، وحتى في راس الدرب .
أما خياتنا غير سارحين ، هاربين على المَسْرب .
إلى قْريتِ شي كتاب قدامهم تعود مُذْنِب .
يضنوك مخبول ولا مْقَرقب .
الناس الزينة بلقراية وصلات للقمر وزاروا المُدَنَبْ .
حنا عدونا اللدود هو الكتاب ، ونْفضلو لقمر و اللعب .
اللي مايقرى يكون مصيرو الصراب والاغتراب .
عايش عيشة الصيبانة فوق ظْهَر كلب .
ديما في اخْصام مع ذاتو ومْعَدب .
ملي تطلع الشمس حتى تغرب .
الجو عندو ديما مْكَهرب .
يدير الثقة في النصاب .
ويسمع لمن هب ودب .
تْجَمْعات فيه جميع لَمْصايب .
هو مغلوب ولاخر ديما غالب .
گالو والله اعلم :
حنا خير أمة أخرجت للناس ، لنشر المحبة والعلم .
باش غير گولو لينا باش ؟ بالتبوحيط والظلم .
ها لي يتفرگع، ها اللي حاقد ، ها اللي مْسَمَمْ .
المحامي ما فيه تيفة يتبع مول الدرهم .
والسانديك حرايمي ويقلب غير عل الهم .
لما حضيتي معاه يغرس فوگ ظهرك لكرم .
اللي قارين القانون هم اللي فسدو الحكم .
الغش منتاشر في لَسْواق ، وشكون يتكلم ؟
هذا يبيع لحَمْ لكلاب لبنادم .
وهذا اختصاصي غير في التبوحيط والظلم .
يشهد بالزور وما شاعر بالإثم .
وواحد يقطع اللحم بالريگلة من كثرة التسقريم .
ويجيو يگولو لنا بلا حشمة حنا شعب الكْرم .
ما شفنا غير لعضام والخبز الكارم .
الكوزيني موسخ ، ووجهو عامر دسم .
حوايجو مهدرشين ، وحالتو طيَحْ الضيم .
الحاصول مع هاد الناس إلى بغيت تسلم .
سبق الميم ، وبحرف الشين نختم النضم :
مانايضش، مانايضش، مانايضش .
خاصنا نگولو هادي خير أمة خَرْجات على الناس .
وانتما اللي من الصباح وكتفرنسو .
اشنو آخر حاجة قريتو؟
– بوشعيب : معايا تاتهضر السي عاريفان ؟
– الشاب : أنت واللي حداك ، معاكم تانهضر ، ماشي مع لمقابر .
– بوشعيب : عندي كتاب ديال تفسير الأحلام ، هادي شهرين باقي ما كملتو .
– الشاب : وأنتآ مول الموسطاش ؟
– عبد السلام : أنا تنقرا صحيفة الأبراج ، وورقة الما والضو .
-الشاب : براڤو عليكم ، ما عندي مانتسالكم . في الولايات المتحدة كاين اللي تايقرى 1000 كتاب في العام، غير وضحو
لنا كيفاش غادي ينتشر العلم ، وتعَمْ المعرفة ، وتزدهر الديمقراطية ؟ كيفاش غادي يكثر الوعي بكتاب تفسير
الأحلام ؟ كون قريتو غير أش كتْبو لمتنورين من أجدادكم كون دَرْتو مْزية .