باريس: ربيعة منوني
حلمْتْ وترجيتْ..
وقلتْ مع راسي..
إمتى يجود الزمان عليا ..
ويحْن ويوهبْ ليا ما تمنيتْ..
ليام مشاتْ وجاتْ..
بعض الوجوه تبدلاتْ..
واخرى كيف ما عرفتها بقاتْ..
والعين ياما شافت
وشحال بكاتْ
على نفوس بالخير ما قرٌاتْ
الناس سولاتْ..
وعلاش عولاتْ ؟؟..
الطيور المهاجرة ترجع لوكارها..
وفيها يطيبْ نعاسها وتْباتْ..
العمْرْ غادي ومحسوبة يامو..
الصيف ومن بعدو الشتا..
الربيع يْكْسي..
والخريف يعري الشجراتْ..
عند بالي قْطْعْتْ الواد ونشفو رجليا..
يا حْسْرا..
البسمة ولات معبورة..
والفرحة مشاتْ وما ولاتْ..
كنا صغار ضاحكين ولاعبين بين المروج،
شرقات شمس
ولا شتاصبات
لا خوف من دواير الزمان
لا هم، لا شقا
خدات الدنيا ولا عطات
اليوم وليتْ طالبة..
غير دقيقة من دوك الساعاتْ…