زجل .. عزري الدوار ..

 

بقلم : الحاج عمر الزواق

عزري الدوار

ملي خرج السلكة

نجا من الشبكة

ومحا العار ..

عزري الدوار

بايعوه سلطان للطلبة

اصبح سلهامو من الحرير

وتبدلات نوالتو قبة

فطورو عسل

وركابو راس الصربة ..

عزري الدوار

جرب توب السلطان

والفو وعجبو

ما بغى يحطو للتصبان

زاد عليه قفطان

ما والمو ما جا كدو..

عزري الدوار

جرب الحرث .. كلب الارض

عجباتو لقاها راوية

والدنيا مبهجة زاهية

سقاها بالشحمة الغاوية

دهن وتشافى من العلة..

عزري الدوار

ناوي يحصد بلا منجل

جات الصابه غابة

طابت السبولة العطشانة

وفاح منها لفريك ..

ولوان مباهية بلعمان

مضوية الجنان ..

والحصاد عندو شروطو

والنية الزينة

هي الباب الواسع للحل

هي المفتاح اللي بغى يدخل..

عزري الدوار

غير كمل العام

وطغى ف الاحكام

وبدا بالعاتقات

نسى العهد .. فات الحد

شعل نار الحسد

بين الولد والجد

مدح راسو وحدو

وما بقى كدو حد ..

عزري الدوار

عطات ريحتو

تكبر على نوبتو ف التويزة

وكال : أنا حاكم القبيلة

عفيوني من هاد التبهديلة

التويزة ماشي فرض ..

وترشح بلا ما يفهم

ناعورة التصويت طحناتو

حسبها فتيل شريط

ولا بردعة من الدوم

لقى راسو جرارة للبير

يسكيو عليه للحمير ..

عزري الدوار

ف وقت قليل شاب

ما نفع فيه حجاب

نفروه لبعاد ولقراب

لقى راسو منسي

عصر البرد

عمر حلاب من الريح

حسب بالجوج وبالفرد

ما بقى ليه غير الريح

وصبحات كرشو بطانة

النهار كلو وهو يجدد الوضو

باكي ونادب خدو ..

عزري الدوار

تاب وصام هاد العام

حناو ليه يديه

لبسوه جلابة وسلهام

كالو نخطبو ونعرسو ليه

نستروه ونجمعو ليه رجليه ..

بنات الدوار ما نساو العار

فكروه ف ايامو شبعوه معيار

غناو عليه ومثلوه بالفار

واكل الشياطة عايش ف غار ..

عزري الدوار

عقلو عليه .. كذوبو ف عينيه

واخا نصحوه اللي حبوه

واخا خوى لبلاد .. بات ما صبح

واخا هنا لعباد .. خاف يتفضح

عقلو عليه .. علامتو ف وذنيه

راه ينسيكم ويرجع

يرجع مع الحملة

وسوق الكلام بالجملة

عقلو عليه

راسو قاسح ما يسمع .

تعليقات الزوار
Loading...

شاهد أيضا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على هذا ، ولكن يمكنك إلغاء الاشتراك إذا كنت ترغب في ذلك. موافق المزيد