باريس: ربيعة منوني
آش من نهار
يهنا بالي
نفرح ونزها بحال الناس
نرتاح..
ونحط رحالي
عمركم شفتو يا ناس
واحد ميت
وهو حي بحالي
ما همني من هاد الدنيا
لا مال ولا جاه
لا جديد
ولا غالي..
بغيت غير وجه الحباب
يسعد قلبي بملقاهم
نقص عليهم
ونحكي
سر غربتي
وتجوالي..
نضل ندور بحال الرحى
نقلب على مكاني
وشكون يسمع قصتي
ويفهم حيرتي
وتسوالي ؟
فين مشيت ؟
وعلاش ؟
وكيفاش دفنت حلامي ؟
وضاع عزي
ومرشالي ؟
درتها بيدي..
وعلاش نبكي ؟
ما علي غير نرضى بالمقسوم
والله راه عالي
وعالم بحالي