فين عمراللحية كانت مقياس للدين ؟؟

فين عمراللحية كانت مقياس للدين ؟؟  حقيقة كانت تتعطي وقار للشخص ولكن دبا ولات لعنة …. كل من حفظ جوج سور ولا تيفتي،و يعطي مواعظ ، و يحلل و يحرم …. و الطامة الناس تيتبعوه حيث أغلبيتهم شخصيات إتكالية ، وحيث تايكونوا دايرين زبايل تايشوفو راسهم فهاذ الفقيه إلي تيتسناو بركتو و إلي داخل الجامع ببلغتو …… المصيبة الأساس الديني عندو خاوي : تجي تناقشو يبدا يقمع فيك بصوت عالي باش يسمع غير الصوت إلي فالداخل ديالو ، صوت خارج من شخصية مهتزة ، مقموعة ، مكبوتة ، دازت عليها ودوزات  لمراير ، جاهلة  مقرياش و المصيبة حتى الوعي ما وعياش ، داكشي علاش ماخصناش نستغربوا منين يطلع ليك واحد محركاه المكبوتات ديالو و يفتي للعيالات باستعمال الخيزو ، أو الراجل إلي مصدوم فموت مراتو يمارس عليها الجنس، حتى لهذ  الدرجة عقلوا فسروالو؟؟؟؟؟؟ أو هاذ بولحية  إلي و لد من ختو تصيبها حتى هي بالخمار، من فوق زنى المحارم قتلو روح؟؟؟؟ و لا……….. ولا….ولا….. لا حول و لا قوة إلا بالله  .
كاينين ناس فالمستوى و أكثر،  فقمة الإيمان و الوعي، عاديين ، عارفين بينهم و بين الله  يفسروا و يبسطوا ليك الدين و يحببوك فيه، ماشي بالضرورة يكونوا باللحي حيث اللحية ولا الحجاب ماشي مقياس للإسلام و الدين ولا كون  نسبوه لفرويد أو شي كيفارا … حتى ليهود عندهم اللحي؟؟؟
وسختو بفعايلكم الدنيئة سنة نبيلة ديال سيدنا محمد عليه أزكى الصلاة و السلام , حتى ولينا تنتفاداو صحاب اللحي في تعاملاتنا اليومية . آ لمزوق من برا آش أخبارك من الداخل