بقلم : عمر الزواق
____ مهداة لروح المسمى قيد حياته : الطيب الصديقي .
……………..
إيلا جات .. جات
ما نفعو فيها سادات
جات ف وقتها بالدات
ما تعدات ما ظلمات ..
إيلا جات .. جات
ما بقى تعياط
ف السما دارت علامات
ما غلبوها قصور ولا عمارات
ما شراوها فلوس ولا شيكات
ماحبسوها دموع الباكيات ..
إيلا جات .. جات
ما فرقات بين الرجال والعيالات
بين الشبان والشابات
بين البلدان والقارات ..
إيلا جات .. جات
ما همتها لمسافات ولوقات
النفس إيلا طغات
ونسات حكمة المماة
تصبح عافية .. تاكل ما تشبع
ولا أرض جايحة ..غير كتبلع ..
إيلا جات .. جات
واللي تولد مات وفات
اصبح ذكريات وحكايات
الفطين وجد فين يبات
ونور بيتو من الظلمات
باع للدنيا الرغبات والشهوات
وتاجر بالدعاء والصلوات
وفرش طريقو بالحسنات
وذاق حلاوة فعل الخيرات
ماهمو إيلا جا هازم اللذات ..
إيلا جات .. جات
وبنادم نسى لوقات
البارح واليوم وغدا ..ايام تساوات
البارح مشى , ما ودعنا ما ودعناه
اليوم احنا فيه , طالبين غير القوت
واللي كال غدا ديالو , حكر الدنيا والموت ..
وإيلا جات .. جات
ما نفعو فيها طبا ولا سادات
اللي حبو مولاه , بلاه
وذوقو من لعذاب , احلاه
وبالصبر فرش ليه وغطاه
وواعدو بالرحمة يوم ملقاه .
