من ديواني ’’ كلام منسوم من البارح واليوم ’’
قصيدة مهداة إلى الأديب الزجال
سيدي أحمد المسبح .
……………….
م اللي الدجاجة عادت كتركل
ركبت جناح النسر
صاحب ’’ كلام ضاوي’’
هجرت الصحرا والرمل
وريحة الشيح والزعتر
وطلعت للسما نتساوى
حلقت فوق الضباب
شربت لفهامه
ف زلافة لفقيه لمسيح
دواتني الحقيقة
سكرني لكلام لمساوي
لكلام لمصفي لمدرح
وعرفت اللي يغا يدفن الهم
يسد كرشو ويشلل الفم
السم ما يداويه غير السم
مشا وقت المعرفة والدرهم
هذا ديالنا .. هذا صاحب لمقدم
ما يخرج من الصف غير لبكم
ولا مكلخ فاتو لفهم
تذوقت لكلام الضاوي
وكلت فاين لكلام لمظلام
واش اللي كان هو ماكان
ولا كاين شي ف هذا الكون؟
حاولت نفهم
سبقاتني العافيه للتبن
حركات الشحم واللحم
والباقي .. مات جيفه
وف السما بانت العلامه
وف الارض الشتا رسمات
راية البلاد
والرمله حاركه بلا خبار
الاجداد
ركبوها السفينه وقلعو الاوتاد
احنا حالفين
حتي حبة ما تضيع
وهوما باعوها
بالعلالي والفريع
الرمله عمات عينيا
طلبت النسر يخفض لجناح
ويحطني نحقق ونرتاح
وخا وصاني نتقن الغرزه
ونمضي لمقص قبل الدزه
لقيت كلامي ناقص معنى
وكلامو معمر ساحتو
حروفي قلال
وهو خيال
ف التبوريده راحتو
وسولتو
شفتك ساكت على هذا الحال
واش ما سمعتي الرمله كتبكي
محركينها على عينيك أبنعدي؟
جاوبني
بصمت مسموع
وبالدليل المكتوب قنعني
ياك قريتي ال.. ’’ حريفات ’’
وشميتي .. ’’ ريحة الما ’’
ومن .. ’’ ظل الروح ’’
طلعات ليك .. ’’ نجمة ’’
وظهر .. ’’ خيال الما ’’
راه ف.. ’’ بلادي ’’
الوقت .. ’’ حال وأحوال ’’ ….
وعرفت ..الإنسان
يمكن ينسى همو
ينسى الورد إيلا شمو
وكيف ينسى
من سكن قلبو ودمو
والرمله اخت التراب
منها خلقنا
جاريه ف الدم
وصارحني
كثرتي عليا لكلام
بلا متخمم
وكثرة الفار كتحرق القفال
وتعيش ف الهم
نصحك أخويا .. شوف غيري
راه الافكار ما عليها ضريبه
وأنا ما كنعرف نسيري
وغريبتي معا دوك الناس غريبه
وبلا ما نخمم
شركت الاوراق
المكتوبه بالنفاق
واصبحت بوراق
ركبني الهدهود
ومشيت نشرب
من واد لعجب
وشفت ..
شفكت الناكة عارضة النهود
آش ندير اللي ما عليه حكام
وشفت البكرة راكبها نمرود
هاديك علامة الحب والغرام
وشفت لحمار يعصر العنقود
مسكين كهمو الشحم وليدام
وشفت موكا طاليه لخدود
ومكحله حتى ف الظلام
وشفت الزرزور مربي الدود
وبايعو بالكمشه والعرام
وشفت مسيسي تضرب العود
راه ربحات جائزه الأنغام
وشفت لقرود مكسرين لقيود
ومحتجين رافدين لعلام
وشفت الذيب يسطر لحدود
مسكين ما كاد على خصام
وشفت الثعلب سارح العروض
راه مرشح لبرلمان السلام
وشفت اللفعى مزوجة الكنفود
آح على محاين العشق ولغرام
وشفت النمل يحارب بسفود
ياكما هداك سيف من لعظام
وشفت البوساق يطيح وينوض
ياكما تابعو شي شمشام
وشفت الجراد يجمع ف الشهود
هاديك شي همزه د الحرام
وشفت البرغوت عاطيها للزرود
قريصو ما يفور عليه طعام
وشفت الشهود جاريين على الشهود
راه كلشي عارف علاش خدام ..
وأنا حدي ديتها ف الكلام
حلقي نشف .. مدادي جف
وقريب نموت جيفه
جاب الله فيقوني من الحلم
ولقيت صبعي كيكتب
بالدم OMAR m’a tue.. r
’’ عمر… قتلني ’’.