من ديوان ’’ كلام منسوم من البارح واليوم
بقلم همر الزواق
شحال كيعجب
بنادم المتواضع
الساكن ف قلوب الناس ..
ديما محبوب وعالي
واخا حادر الراس ..
والراس إيلا تقلاتو الحكمة
يسقي اقوام بلا ما
وتعم النعمة يحلى الكاس ..
اعفيني من نوع الخلايق
اللي بغى يكون بنادم
غير بالفم ..
ما بغى يقرا
ما بغى يفهم
ما بغى يحشم
ما بغى يسد الفم ..
إيلا نصحتيه تندم
كلامو عل الظلم
وهو الظالم ..
لا منطق زين لاصدق باين
لا ودن سامعة
غير التهديد بالدم ..
بغى يكون بنادم
بالقوى .. بالزز
داير ف جيبو ألف حرز
فضيحتو باللقاط ما تتهز ..
كلشي تخبل عندو
ما بقى يفرز
الشوهة من العز ..
كلشي عريان
ماكاين ما يتدز
الكلام الجاري
ما يتنج
وزايدها بالخفة
طالع نازل
غير كيقفز
راكبو بوهزاز ..
علاش العجب ؟
هو مربي الخنزير والوز
ويتشكى من الخنز ..
يتباهى بالنظافة
واظفارو ف مناخرو
باحثين عل الكنز ..
وشحال من بنادم بحال هداك
تجبر وتكبر
وما تعرف ليه قبر ..
فاين بنعلي اللي تعالى
واكفر بقدرة العالي ؟
فاين فرعون الزمان
فاين هامان اليمن
وفاين دوك القومان ؟
فاين اللي ظن اشرى العز
وعامل اخوتو بالطنز ؟
فاين زنكه ..زنكه
فاين كلام الطوز ؟
بنادم إيلا تربى ف العز
ما يريب ساسو ما يتهز
ما تحركو غمزة
عزة النفس هي كل شي
هي القناعة بأقل شي
واخا محتاج لكل شي .